Po dalin dëshmi të reja në lidhje me ngjarjen e rëndë të ndodhur dy ditë më parë në sallën e gjyqit në Gjykatën e Apelit, ku gjyqtari Astrit Kalaja u vra në krye të detyrës.
Ervis Kurtaj, një nga të plagosurit dhe dëshmitar kyç i kësaj vrasjeje, ka rrëfyer momentet dramatike të ngjarjes. Ai ndodhej në sallën e gjyqit së bashku me babanë e tij, Rakip Kurtaj gjithashtu i plagosur, si palë në një proces gjyqësor që i përfshinte përballë familjes Shkambi.
Sipas dëshmisë së tij, gjithçka ndodhi menjëherë pasi gjyqtari shpalli vendimin në favor të tyre. “Në atë moment, Elvisi u ngrit nga vendi dhe iu afrua gjyqtarit duke e qëlluar disa herë me armë zjarri,” tregoi Kurtaj.
Ai shtoi se në çastin kur dëgjoi të shtënat, kapi babain për dore dhe u përpoqën të largoheshin drejt korridorit. “Teksa po kalonim derën e sallës, Elvisi u kthye dhe qëlloi drejt nesh,” tha ai.
Të dy, babë e bir, mbetën të plagosur dhe u transportuan menjëherë në Spitalin e Traumës, ku morën ndihmën e nevojshme mjekësore. Fatmirësisht, gjendja e tyre shëndetësore tashmë është jashtë rrezikut për jetën.
