Ky që shihni në këtë foto është Daniel Cornea, shtetas rumun. Ai është shpallur në kërkim ndërkombëtar si autor i dyshuar i vrasjes së Renato Hoxhajt, roje i një pallati në Vlorë.
Renato Hoxhaj dyshohet se ishte informator i grupeve kriminale. Për vrasjen e tij janë arrestuar dy persona të tjerë. Sipas policisë, krimi është urdhëruar nga Dubai.
Ngjarja
Në muajin prill 58 vjeçari Renato Hoxhaj u ekzekutua me 4 plumba në lagjen “Hajro Çakërri” në Vlorë pranë banesës së tij. Ai punonte prej pesë vitesh si roje në një objekt në ndërtim aty pranë.
Nga grupi hetimor bëhej me dije se autori ishte i maskuar me kapele dhe shall dhe ka qëlluar viktimën 4 herë para se të largohej në këmbë nga e njëjta rrugë nga erdhi.
“Sot, rreth orës 06:00, në lagjen “Hajro Çakërri”, në rrugë, në afërsi të banesës së tij, është gjetur pa shenja jete, dyshohet i vrarë me armë zjarri, shtetasi Renato Hoxhaj, 58 vjeç, i cili ishte i punësuar dhe si roje në një objekt në ndërtim pranë banesës së tij. Është ngritur një grup i posaçëm hetimor dhe, nën drejtimin e Prokurorisë, vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve”, njoftonte policia.
Lidhur me ngjarjen Policia siguroi pamje nga kamerat e sigurisë në lidhje me ngjarjen e rëndë. Burime nga grupi hetimor asokohe bënë me dije se autori kishte hyrë nga një shteg i ngushtë që nuk përdoret shpesh nga këmbësorët. Ai ishte i maskuar me kapele dhe shall dhe ka qëlluar viktimën 4 herë para se të largohej në këmbë nga e njëjta rrugë nga erdhi.
Hoxhaj mori 2 plumba në kokë dhe dy në trup, ndërsa pistoleta ka qenë me gëzhoje 9 mm.
