Xhaxhai i Elvis Shkëmbit, i cili vrau gjyqtarin Astrit Kalaja në sallën e gjykatës, ka kërkuar sot në Gjykatën e Apelit që masa e “arrestit në burg” ndaj tij të zëvendësohet me një masë tjetër.
Gjon Shkambi, i dyshuar si nxitës dhe për të pasur dijeni mbi planet e nipit, deklaron se nuk kishte asnjë dijeni për veprimet e Elvis Shkëmbit. Si argument për ndryshimin e masës, ai ka paraqitur dy kartela mjekësore të bashkëshortes së tij, e cila sipas mbrojtjes është në gjendje të rëndë, dhe të tijën. Ai ka ripërsëritur gjithashtu keqardhjen për krimin e rëndë.
Pas arrestimit, Shkambi ishte lënë në arrest në burg, por ka shmangur rekursin në Gjykatën e Lartë dhe është drejtuar Apelit. Tre kërkesa të mëparshme për ndryshim mase i ishin refuzuar si të pabazuara në ligj dhe prova.
Ndërkohë, autori i vrasjes, Elvis Shkambi, nuk ka depozituar asnjë kundërshtim ndaj masës së arrestit. Në rrëfimin e tij para policisë, ai ka pranuar se krimi ndodhi pas një konflikti pronësor 30-vjeçar dhe në gjaknxehtësi, duke plagosur edhe dy persona të tjerë. Prokuroria dyshon se vrasja ishte e planifikuar, pasi Shkëmbi hyri në sallën e gjykatës së Apelit me armë.
Hetimet janë ende në zhvillim përpara dërgimit të çështjes në gjykim. Kërkesa e Gjon Shkëmbit për ndryshimin e masës pritet të shqyrtohet këtë të martë në orën 09:45. Më herët, qelinë e kishte lënë edhe punonjësi i gjykatës Banush Koxhaj, i dyshuar për shpërdorim detyre, pasi nuk kryeu kontrollin e duhur me detektor, duke mundësuar hyrjen e armatosur të autorit.
