Gjykata e Tiranës ka vendosur që Elvis Shkambi, xhaxhai i tij Gjon Shkambi dhe punonjësi i sigurisë Banush Koxhaj të qëndrojnë në paraburgim deri në përfundim të hetimeve, në lidhje me ngjarjen e rëndë të ndodhur më 6 tetor në ambientet e gjykatës.
Në dëshminë e tij para trupit gjykues, punonjësi i sigurisë Banush Koxhaj deklaroi se nuk ishte në gjendje të mirë shëndetësore në momentin e ngjarjes, duke theksuar se kishte njoftuar kancelaren për gjendjen e tij.
“Kam qenë i sëmurë. Para se të kalonin palët në skaner, e kam njoftuar kancelaren se nuk ndihesha mirë, pasi vuaj nga diabeti. Rreth një orë më pas, më dha leje për t’u larguar, por nuk u zëvendësova,” u shpreh ai.
Seanca ndaj të pandehurve u zhvillua me dyer të mbyllura dhe nën masa të rrepta sigurie, për shkak të natyrës së rëndë të krimit.
Elvis Shkambi akuzohet se brenda sallës së gjyqit vrau gjyqtarin Astrit Kalaja, si dhe plagosi me armë zjarri dy persona të tjerë, babë e bir, Ragip dhe Ervis Kurtaj, palë në procesin gjyqësor. Ai përballet me tri akuza të rënda, “Vrasje e funksionarit publik”, “Vrasje në rrethana cilësuese kundër palëve të përfshira në proces, kryer në bashkëpunim dhe mbetur në tentativë”, “Mbajtje pa leje e armëve dhe municioneve luftarake”.
Ndërkohë, për xhaxhain e tij, Gjon Shkambi, Prokuroria dyshon se ka pasur dijeni për planin e nipit të tij dhe ka luajtur një rol nxitës në përplasjen me palën kundërshtare, me të cilët kishte konflikt për një çështje prone në Shkodër.
Hetimet për ngjarjen tronditëse vijojnë, ndërsa autoritetet po shqyrtojnë edhe aspektet e sigurisë brenda ambienteve gjyqësore.
