Policia e Shkodrës po heton si pistë kryesore atë të gjakmarrjes, lidhur me vrasjen e Frrok Lleshajt në fshatin Paçram në Vaun e Dejës mbrëmjen e kaluar.
Gjithçka duket se nis në 1991, kur në Greqi vritet djali i 65-vjeçarit.
Siç rrëfejnë dëshmitarët, pas vrasjes së djalit, Frrok Lleshaj dyshonte te kushërinjtë e tij, edhe pse u tha se i biri u vra nga policia greke.
Ai mori hak duke vrarë kushëririn e tij Dodë Lleshaj.Këtë ngjarje 65-vjeçari nuk pranoi ta kishte kryer.Më vonë ai akuzohet se vrau një pjesëtar të një familjeje nga Puka, ngjarje për të cilën u dënua me 25 vite burgim dhe rifitoi lirinë në 2023.
Hasmëritë me të dyja familjet janë të pambyllura.
Frrok Lleshaj pas daljes nga burgu i ishte kthyer një jete normale. Ai kujdesej për bagëtitë dhe mbrëmjen e kaluar u vra teksa po kthehej në shtëpi.
Gjatë 10 orëve, policia ka shoqëruar disa persona edhe nga familjet në konflikt, por ende nuk ka ndonjë të arrestuar. Me vrasjen e Frrok Lleshajt, shkon në 5 numri i viktimave për shkak të hasmërive, sepse atij i është vrarë edhe një vëlla më shumë se 30 vjet më parë.
