Gjykata e Posaçme vendosi këtë të enjte të kalojë për gjykim dosjen penale ndaj Safet Bajrit, i konsideruar si i forti i Dobraçit në Shkodër, Behar Bajrit, Astmer Bilalit dhe Eria Agos, të pandehur për vrasjen e Fatbardh Licit në vitin 2018 në Shkodër.
Avokatët e të pandehurve kërkuan pushimin e çështjes ose kthimin e akteve për plotësim hetimesh, duke argumentuar se më parë prokuroria e Shkodrës kishte pezulluar dosjen për mungesë provash.
Megjithatë, Gjykata e Posaçme vlerësoi se SPAK ka hetuar në mënyrë të plotë dhe të gjithanshme dhe, për këtë arsye, e kaloi dosjen për gjykim.
Ndaj Safet Bajrit, Behar Bajrit dhe Astmer Bilalit rëndojnë akuzat për “Vrasje me paramendim”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”. Sipas SPAK, tre të pandehurit organizuan dhe realizuan vrasjen e Fatbardh Licit, xhaxhait të Ibrahim Licit, kundërshtar i përbetuar i tyre. Hetimet treguan se ata e akuzonin Ibrahim Licin për vrasjen e Boran Bërcanës, ish-efektiv policie, dhe partneres së tij, Silvi Ndoci. Në shenjë hakmarrjeje, ata i vranë xhaxhain.
Ndërkohë, Eria Ago, ish-partnere e Safet Bajrit, akuzohet se iu dha ndihmë autorëve të krimit për t’u larguar nga vendngjarja.
