Policia ka dyshime se Egli Palloshari, ish-gardian i burgut 313 në Tiranë, u godit për vdekje me thikë pasi kishte ngacmuar gruan e autorit të dyshuar, Gazmend Buçpapa.
Ngjarja ndodhi në rrugën “Kongresi i Lushnjes”, pasditen e djeshme rreth orës 15:40, kur Egli Palloshari sapo kishte dalë nga makina kur u përplas me Buçpapën, i cili ishte në shoqërinë e gruas dhe dy personave të tjerë. Mes tyre ka nisur konflikt dhe në një moment Buçpapa e ka goditur me thikë, duke i shkaktuar vdekjen.
Sipas policisë, gruaja e Buçpapës, që punonte në një market, e kishte informuar bashkëshortin për ngacmimet e vazhdueshme të ish-gardianit, çka dyshohet të jetë bërë shkak për krimin. Policia tha se pas ngjarjes, Buçpapa dhe të tjerët u larguan me makinën e këtij të fundit. Më pas autori i dyshuar ka shkuar në banesën e tij, është ndërruar dhe ka dalë në arrati. Deri në këto momente nuk është arrestuar nga policia.
