Pasi zhvilloi disa konkurse farse dhe zgjodhi të besuarit e tij në krye të drejtorive kryesore të policive në qarqe, Ilir Proda ka nisur aksionin “fshesa” sepse me gjasë rrugës është përplasur me ta.
Vilson Bala, ish-shefi i Forcës së Posaçme Operacionale që mori drejtimin e Policisë së Durrësit, tashmë është propozuar për t’u transferuar në Policinë e Korçës.
Pavarësisht se shkon drejtor edhe në këtë qark, për Balën largimi nga Durrësi është një goditje, pasi ishte në krye të një prej drejtorive të rëndësishme.
Ende nuk është caktuar një emër se kush do të zëvendësojë Balën. Por në kohën kur SPAK po heton kupolën e Policisë së Shtetit për lidhje me Ergys Agasin, i dyshuar si kreu i një grupi kriminal në AKSHI, tronditjet pritet të jenë të forta. E këto lëvizje me shumë mundësi janë përpjekje për të minimizuar efektet që mund të vijnë nga goditjet e prokurorisë së posaçme.
