U desh që një zjarrfikëse të mbetej e bllokuar rrugës drejt pallatit në flakë në zonën e Farmacisë 10, që IMT të kujtohej për detyrën e vet dhe të ndërhynte për të shembur një ndërtim pa leje pranë QSUT.
Objekti në fjalë, i identifikuar si farmaci, kishte zënë hapësirën e kalimit, duke penguar drejtpërdrejt lëvizjen e mjeteve të emergjencës drejt vendngjarjes. Vetëm pasi pamjet e zjarrfikëses së bllokuar, që nuk depërtonte në zonën e zjarrit, bënë xhiron e rrjeteve sociale, Inspektorati i Mbrojtjes së Territorit reagoi duke ndërmarrë sot aksionin për prishjen e objektit.
Edhe kjo situatë tregon “seriozitetin” e aksioneve të IMT në Tiranë për shembjen e ndërtimeve pa leje. Duket se disa ndërtime arrijnë t’i shpëtojnë syrit të inspektoratit dhe facebokut të kryemnistrit kur i bënë jehonë këtij aksioni.
