Armando Ndreca, vëllai i deputetit socialist Eduard Ndreca, është dërguar në Gjykatën e Posaçme pas përfundimit të hetimeve nga SPAK, ku akuzohet për kultivim dhe trafikim të lëndëve narkotike, si dhe pjesëmarrje në një grup kriminal të strukturuar.
Hetimet e SPAK zbuluan rolin organizativ të Ndrecës në kultivimin dhe shpërndarjen e 243 kg kanabis në zonën e Lezhës gjatë vitit 2020.
Ndreca u arrestua për herë të parë në 2024, pas zbulimit të një stani të kthyer në serë kanabisi në Lezhë, por u lirua për mungesë provash, ndërkohë që dy persona të tjerë u arrestuan.
Në janar 2025, ai u arrestua sërish gjatë operacionit “Revanshi”, pasi u përfshi në komunikimet e grupit për kultivimin e drogës. Një muaj para arrestimit nga SPAK, Policia e Lezhës e ndaloi për lidhje me një serë kanabisi.
Në dosjen e SPAK, përveç Armando Ndrecës, përfshihen edhe ish-deputeti Arben Ndoka dhe nipi i tij, Samuel Ndoka.
