Përmbytjeve në qytetin e Durrësit nuk i ka shpëtuar as “Veliera”, projekti që u ka kushtuar qytetarëve miliona euro nga xhepat e tyre.
Nënkalimi pranë portit është mbushur sërish me ujë, ndërsa në zonë ndodhet një mjet zjarrfikës për të mundësuar largimin e ujërave nga nënkalimi, i cili është bërë i pakalueshëm.
“Kryevepra arkitekturore”, që kushtoi mbi 10 milionë euro, rezulton të mos ketë një sistem funksional kanalizimesh për shkarkimin e ujërave, duke u përmbytur për të disatën herë sa herë reshjet intensifikohen.
Projekti “Veliera” u financua fillimisht në mars të vitit 2016 me një fond prej 4.7 milionë euro. Kontrata u fitua nga bashkimi i kompanive “Everest” dhe “Fusha”, të cilat nisën punimet. Megjithatë, punimet e mëvonshme e çuan koston totale të projektit në rreth 10 milionë euro.
Gjatë inaugurimit, kryeministri Edi Rama e cilësoi Velierën si një kryevepër arkitektonike, që do t’u shërbente këmbësorëve dhe vizitorëve, duke e konsideruar atë si një kartolinë turistike për qytetin e Durrësit.
“Një kryevepër arkitektonike, e cila krijon një hapësirë të re publike për këmbësorët e qytetit, vizitorët dhe turistët gjithnjë e më të shumtë, si edhe një tjetër kartolinë të Shqipërisë së Rilindur Turistike”, theksonte Rama.
Ndërsa sot, kjo “kryevepër” duket se është shndërruar në një ujëmbledhës sa herë bie shi, duke bllokuar lëvizjen e qytetarëve dhe duke u kthyer në një kartolinë qesharake prej 10 milionë eurosh për turistët që vizitojnë Durrësin.
