Kryebashkiaku i Tiranës troket sërish në Gjykatën Kushtetuese. Përmes një kërkese të re të depozituar këtë të premte në Kushtetuese, ai kërkon shfuqizimin e vendimit nr. 29, datë 09.02.2026, të Gjykatës së Posaçme të Shkallës së Parë për Korrupsionin dhe Krimin e Organizuar, si dhe për pavlefshmërinë e të gjitha veprimeve të kryera mbi bazën e këtij vendimi.
“Ky proces është zhvilluar në shkelje të rëndë të të drejtave themelore. Z. Veliaj dhe mbrojtjes së tij i është mohuar koha reale për të analizuar një dosje me dhjetëra mijëra faqe, duke e reduktuar mbrojtjen në një formalitet; Parimi i barazisë së armëve është cenuar, pasi prokuroria ka vepruar në avantazh të plotë procedural; Gjykimi është zhvilluar në kushte që cenojnë pavarësinë dhe paanshmërinë e gjykatës; Z. Veliaj është trajtuar në mënyrë të tillë që cenon prezumimin e pafajësisë dhe dinjitetin njerëzor, përfshirë mbajtjen në kushte izolimi gjatë seancave ku ai duhet të mbrohet i lirë”, thuhet në kërkesë.
Sipas avokatit të tij, Plarent Ndreca, vendimi për dërgimin e çështjes në gjyq është marrë mbi një proces të kompromentuar në themel, duke prodhuar një proces antikushtetues dhe për rrjedhojë, të pavlefshëm, i cili nuk mund të prodhojë pasoja juridike të vlefshme.Në këto kushte, Veliaj i ka kërkuar Gjykatës Kushtetuese shfuqizimin e vendimit të seancës paraprake që vendosi për kalimin e dosjes për gjykim, si dhe çdo veprim të kryer mbi këtë bazë.
Erion Veliaj është i pandehur nga SPAK për 13 akuza penale, si korrupsion, pastrim parash apo fshehje e pasurisë.
