Pas reshjeve të fundit të shiut dhe dëborës, prurjet në basenin ujor të liqenit të Ulzës janë rritur ndjeshëm, duke bërë që niveli i ujit të arrijë kuotën maksimale pranë digës së hidrocentralit.
Si pasojë, niveli i ujit është rritur ndjeshëm edhe në fshatin Urakë të Matit, duke përmbytur një kabinë elektrike e cila ndodhej në zonë prej dekadash. Nga pamjet e siguruara, rezulton se rreth gjysma e kabinës ndodhet nën ujë për shkak të rritjes së nivelit. Banorët shprehen se gjatë ditëve me reshje intensive niveli ka qenë edhe më i lartë, ndërsa prania e ujit në kontakt me instalimet elektrike përbën rrezik serioz për jetën e tyre.
Situata mbetet shqetësuese edhe për tokat bujqësore në fshatrat Urakë dhe Rukaj, të cilat janë përmbytur si pasojë e fryrjes së liqenit. Rritja e nivelit të ujit ka sjellë vërshime në zonat e zallit të “Kurvajës” dhe “Tharbnit”, duke shkaktuar dëme të konsiderueshme.
Sipas banorëve, vërshimet nga zalli i “Tharbnit” kanë dëmtuar rezervatet e peshkimit dhe kanë vënë në rrezik edhe disa banesa pranë zonës. Ata theksojnë se kjo situatë është përkeqësuar pas rritjes së kuotës së portave shkarkuese të digës së Ulzës, ndërhyrje e kryer disa vite më parë nga kompania turke KURUM.
Banorët akuzojnë kompaninë për dëme të përsëritura dhe shprehen se, pavarësisht kërkesave të vazhdueshme për të mos lejuar që niveli i ujit të arrijë pikën maksimale, shqetësimet e tyre nuk janë marrë parasysh.
