Faruk Fatih Özer, i njohur si “mbreti” i kriptomonedhave dhe themelues i platformës së dikurshme “Thodex”, është gjetur i pajetë në qelinë e tij në burgun e Tekirdagut, në perëndim të Turqisë.
Sipas raportimeve të mediave turke, trupi i tij u zbulua gjatë kontrolleve rutinë nga oficerët e burgut. Ai ishte varur në banjën e qelisë dhe, pavarësisht ndërhyrjes së menjëhershme të ekipeve mjekësore, nuk mundi të shpëtohej. Autoritetet kanë hapur një hetim zyrtar për të përcaktuar rrethanat e ngjarjes, ndërsa pista kryesore që po shqyrtohet është ajo e vetëvrasjes.
Lajmi është konfirmuar nga transmetuesi shtetëror turk TRT, ndërsa autopsia pritet të sqarojë shkaqet e sakta të vdekjes.
Faruk Özer ishte arrestuar më 30 gusht 2022 në Shqipëri, pas një urdhër-arresti ndërkombëtar të lëshuar nga autoritetet turke. Ai u ekstradua në Turqi në prill të vitit 2023, ku në shtator të po atij viti u dënua me 11.196 vite burg për akuzat e pastrimit të parave, mashtrimit dhe krijimit të një organizate kriminale. Prokuroria kishte kërkuar fillimisht një dënim rekord prej 40.562 vitesh burg.
Themeluar në vitin 2017, platforma e tregtimit të kriptomonedhave Thodex u mbyll papritur në prill 2021, duke shkaktuar panik dhe zemërim tek mijëra investitorë. Sipas autoriteteve turke, kolapsi i saj solli një dëm ekonomik prej rreth 2 miliardë dollarësh, duke prekur afro 391 mijë qytetarë.
Faruk Fatih Özer, i lindur në vitin 1994, konsiderohej si organizatori i një prej skandaleve më të mëdha financiare në historinë moderne të Turqisë. Hetimet pritet të zbardhin nëse vdekja e tij ishte akt vetëvrasjeje apo lidhet me rrethana të tjera ende të panjohura.
