Gjykata Kushtetuese ka caktuar datën e shqyrtimit në seancë plenare të çështjes që lidhet me Arben Frrokun, i dënuar me burgim të përjetshëm nga Gjykata e Lartë për vrasjen e komisarit Dritan Lamaj.
Më 17 shkurt 2026, gjyqtarët kushtetueses do të shqyrtojnë kërkesën e paraqitur nga i dënuari, i cili kërkon rihapjen e procesit gjyqësor. Frroku, për të cilin besohet se ndodhet në Holandë, ka kërkuar gjithashtu shfuqizimin si antikushtetues të vendimit nr. 73, datë 29.06.2015 të ish-Gjykatës së Apelit për Krime të Rënda dhe të vendimit nr. 443, datë 08.06.2017 të Kolegjit Penal të Gjykatës së Lartë. Në kërkesën e tij, ai pretendon kthimin e çështjes për rigjykim pranë gjykatës kompetente, me një trup tjetër gjykues.
Arben Frroku u shpall fillimisht i pafajshëm nga Gjykata e Krimeve të Rënda, e cila nuk e konsideroi të besueshëm rrëfimin e dëshmitarit të mbrojtur lidhur me atentatin e ndodhur në derën e banesës së komisarit Dritan Lamaj. Ky i fundit u vra në mënyrë brutale në shkurt të vitit 2013, pak ditë pasi ishte transferuar nga detyra e shefit të Komisariatit të Kombinatit në një pozicion specialisti.
Në Gjykatën e Apelit, Frroku u dënua me burgim të përjetshëm, por në atë kohë ai ishte larguar nga Shqipëria. Më vonë u konstatua se ai ndodhej jashtë vendit me identitet të rremë. Deri më tani, Arben Frroku nuk është ekstraduar.
