Në Santo Domingo është arrestuar 40-vjeçari shqiptar Soni Pepa, i dyshuar për përfshirje në trafikun ndërkombëtar të drogës. Ai prej kohësh fshihej në Amerikën Latine, ndërsa u kap nga Interpoli me një pasaportë shqiptare, dokumente italiane, pesë telefona të koduar dhe një shumë parash cash.
Pepa ishte shpallur në kërkim nga SPAK dhe emri i tij lidhet me një ngarkesë prej 11 tonësh kokainë, nga të cilat 600 kilogramë u sekuestruan në Roterdam, më 7-8 nëntor 2020. Hetimet ndërkombëtare e lidhin gjithashtu me financimin e 10 kilogramëve të tjerë kokainë në të njëjtin qytet.
Sipas raporteve, 40-vjeçari ishte pjesë e një grupi kriminal transnacional, që vepronte në disa vende të Evropës dhe Amerikës së Jugut, me qëllim trafikimin e sasive të mëdha të narkotikëve. Ngarkesa e kapur ishte nisur nga porti i Villetas në Paraguai, me destinacion final portin e Antverpit në Belgjikë.
Pas arrestimit, Pepa është dërguar në Drejtorinë e Përgjithshme të Imigracionit në Santo Domingo, ku po përgatitet deportimi i tij në koordinim me OCN-INTERPOL.
