Gjykata e Posaçme i komunikoi masën e sigurisë “arrest me burg” Soni alias Vilson Pepën, i dyshuar si pjesë e klanit kriminal Çela-Çopja. Ai akuzohet për trafik kokaine dhe grup kriminal dhe u riatdhesua pak orë pas arrestimit në Republikës Domenikane. Pepa akuzohet për trafikimin e 11 tonëve kokainë.
NJOFTIM PËR MEDIAT
1.Kërkuesi Prokuroria e Posaçme Kundër Korrupsionit dhe Krimit të Organizuar me datë 08.09.2025 ka paraqitur pranë Gjykatës kërkesën me objekt: “Marrjen në pyetje dhe verifikimin e kushteve dhe kritereve të zbatimit të masës së sigurimit personal, e caktuar me vendimin Nr. 82, datë 06.08.2025 të Gjykatës së Posaçme të Shkallës së Parë për Korrupsionin dhe Krimin e Organizuar ndaj personit nën hetim Soni Pepa alias Vilson Pepa”.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 112, 228, 229, 230, 238 dhe 248 të K.Pr.Penale, me vendimin nr. 90, datë 09.09.2025, vendosi:
1. Vazhdimin e zbatimit të masës së sigurimit personal me karakter shtrëngues ‘Arrest në burg” e parashikuar nga neni 238 i K.Pr.Penale e caktuar me vendimin Nr. 82, datë 06.08.2025 të Gjykatës së Posaçme të Shkallës së Parë për Korrupsionin dhe Krimin e Organizuar ndaj personit nën hetim: Soni Pepa alias Vilson Pepa si i dyshuar për kryerjen e veprave penale të “Trafikimi i narkotikëve” e kryer në formën e veçantë të bashkëpunimit, atë të organizatës kriminale dhe “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 283/a, 28/1, “Pastrimi i produkteve të veprës penale” e kryer në formën e veçantë të bashkëpunimit, atë të organizatës kriminale, parashikuar nga neni 287/1 gërma “b” dhe 28/1 të K.Penal, “Organizata kriminale” në formën e pjesëmarrjes, parashikuar nga neni 333, paragrafi 2 i K.Penal, “Kryerja e veprave penale nga organizata kriminale dhe grupi i strukturuar kriminal” parashikuar nga neni 334 pika 1 i K.Penal.
2. Urdhërohet Policia Gjyqësore, që personi nën hetim Soni Pepa alias Vilson Pepa, të dërgohet menjeherë në institucionin e paraburgimit, për të qëndruar aty në dispozicion të organit procedues.
3. Urdhërohet Prokuroria e Posaçme kundër Korrupsionit dhe Krimit të Organizuar, dhe policia gjyqësore për zbatimin e këtij vendimi.
4. Kundër këtij vendimi mund të bëhet ankim në Gjykatën e Posaçme të Apelit Kundër Korrupsionit dhe Krimit të Organizuar brënda 5 ditëve, nga njoftimi i vendimit të gjykatës Rruga “Jordan Misja” Nr.1, 1057 Tiranë; tel/fax 0035542231527; gjykata.gov.al Tiranë, më datë 09.09.2025
Gjykata e Posaçme e Shkallës së Parë për Korrupsionin dhe Krimin e Organizuar
