Një çift turistësh nga Zvicra raportohet i humbur në Parkun Kombëtar të Shebenikut në Librazhd, pasi dyshohet se kanë dalë nga shtigjet e shënuara gjatë një ecjeje malore.
Sipas informacioneve paraprake, njëri prej tyre ka pësuar një dëmtim në këmbë dhe ka kërkuar ndihmë urgjente.
Forcat e emergjencës së Administratës së Zonave të Mbrojtura Elbasan, në bashkëpunim me policinë e Librazhdit, janë në terren duke zhvilluar operacionin e kërkim-shpëtimit në zonën e Hotolishtit, një terren i vështirë dhe me akses të kufizuar.
Autoritetet u bëjnë apel vizitorëve që frekuentojnë zonat malore të jenë të kujdesshëm dhe të respektojnë shtigjet e miratuara për të parandaluar ngjarje të tilla.
