Zbulohen detaje tronditëse nga zhdukja e 48-vjeçares Nadire Shpata, nga fshati Bujan i Tropojës. Katër ditë përpara zhdukjes së saj, rrethanat e të cilës mbeten ende mister, ajo ka shkuar për vizitë në spitalin e Tropojës, ku mjekët kanë konstatuar në trupin e saj shenja dhune. Mbetet e paqartë pse rasti nuk është denoncuar në polici nga personeli mjekësor.
Pas kësaj vizite, gruaja është kthyer në banesë dhe mbrëmjen e 22 korrikut, përkatësisht në orët e para të 23 korrikut, rezulton të ketë humbur pa lënë gjurmë. Policia e Kukësit ka arrestuar bashkëshortin e saj, Imer Shpata, nën dyshimet për “dhunë në familje”. Ai ka deklaruar se kishte një marrëdhënie të ftohtë me gruan që nga momenti kur ajo e denoncoi për dhunë, çka çoi në dënimin e tij me 8 muaj burg. Megjithatë, ai këmbëngul se nuk ka asnjë lidhje me zhdukjen e saj.
Sipas dëshmisë së tij, mbrëmjen e fundit gruaja ka qenë në shtëpi, ndërsa në mëngjes është nisur për te motra në Durrës. Por, dyshime të forta mbi alibinë e tij ngre fakti se në makinën e Imer Shpatës është gjetur telefoni i gruas, për të cilin ai nuk ka dhënë shpjegime se si ka përfunduar aty.
Hetuesit dyshojnë se mund të jenë përballë një ngjarjeje të rëndë kriminale, ndonëse në banesë nuk janë gjetur prova që ta vërtetojnë këtë. Fakti që Nadire Shpata ka kërkuar ndihmë mjekësore për shkak të dhunës, ngre dyshime se ajo mund të kishte ndërmend të denonconte sërish të shoqin, çka mund të ketë sjellë një reagim të ashpër nga ana e tij.
Policia po vijon hetimet, ndërkohë që fati i gruas vijon të mbetet mister.
