Sabah Nuzi, i akuzuar për vrasjen për motive gjakmarrje të Klevis Lleshit, për llogari të Aurel Hoxhës alias Aurelinjo Kolvari, dyshohet se është personi që nga burgu urdhëroi që t’i vihej tritol automjetit në pronësi të Oltjon Klosit.
Policia njoftoi se ka zbardhur ngjarjen e ndodhur në orët e para të mëngjesit të datës 10.03.2026, në rrugën “Vasil Ndoçka”, ku një sasi lënde plasëse shpërtheu në automjetin në pronësi të Klosit.
Në pranga përfunduan shtatë persona, të dyshuar si pjesë të grupit kriminal që organizuan ngjarjen, të gjithë me precedentë të theksuar kriminalë.
Saban Nuzit iu komunikua akuza në qelitë e burgut të sigurisë së lartë në Fushë Krujë.
Nga hetimet rezultoi se Sabah Nuzi pretendonte se Oltjon Klosi i kishte pa shlyer një borxh prej 15 mijë eurosh, por borxhi është refuzuar. Sipas policisë dyshohet se paratë buronin nga prishja e pazarëve të drogës. Për faktin se Klosi refuzoi pagesën e borxhit, Nuzi urdhëroi nga burgu t’i vihej tritol.
Hetimet zbuluan se lënda shpërthyese në makinë është vendosur nga Jurgen Gjonaj. Renato Balla, Kristjan Ahmerama dhe Eklips Leti, e kanë ndihmuar duke i siguruar fotot dhe vendndodhjen e automjetit të dëmtuar, biçikletën me të cilën ka lëvizur autori, banesën ku është strehuar si dhe sasinë e lëndës eksplozive të vendosur.
“Sabah Nuzi, aktualisht në IEVP Fushë-Krujë, i akuzuar për vepra të rënda kriminale, dyshohet se është personi që ka porositur vendosjen e lëndës plasëse në automjetin e shtetasit Oltjon Klosi”, njoftoi policia. Ndaj tyre rëndon akuza “Shkatërrim i pronës me eksploziv”.
Tre anëtarët e tjerë, Glentjan Kojtari, Dorjan Hamolli, Geris Molla, dyshohet se e kanë transportuar me makinë autorin e vendosjes së tritolit. Këta të fundit akuzohen për përkrahje të autorit të krimit.
Të dyshuarit:
Sabah Nuzi iu komunikua masa e sigurisë në burg
Jurgen Gjonaj, 32 vjeç
Renato Balla, 25 vjeç
Kristjan Ahmerama, 24 vjeç
Eklips Leti, 27 vjeç
Glentjan Kojtari, 29 vjeç
Dorjan Hamolli, 34 vjeç
Geris Molla, 19-vjeç
