Një shpërthim i fuqishëm ka ndodhur mbrëmjen e së hënës në Fushë-Krujë, ku një automjet tip Range Rover, në administrim të Ilir Locit, kryetar i njësisë administrative, është hedhur në erë.
Mjeti ishte i parkuar në ambientet e një restoranti kur një sasi eksplozivi shpërtheu në pjesën e përparme të tij. Dyshohet se lënda plasëse është vendosur ose hedhur nga një rrugicë ngjitur me restorantin.
Shpërthimi ka qenë aq i fuqishëm, sa është dëgjuar në të gjithë zonën përreth. Fatmirësisht, nuk raportohet për të lënduar, por janë shkaktuar dëme të konsiderueshme materiale.
Përveç mjetit të administratorit, është dëmtuar edhe një fuoristradë tjetër që ndodhej e parkuar pranë.
Në vendngjarje ndodhen forca të shumta policie, të cilat po punojnë për zbardhjen e plotë të ngjarjes dhe identifikimin e autorëve.
