Përfundon autopsia për Xhuana Nikollaj, e cila i dha fund jetës me fostoksinë. Burime pranë Institutit të Mjekësisë Ligjore bëjnë me dije për VNA se në trupin e pajetë të 25-vjeçares janë konstatuar shenja dhune. Ndërsa nuk rezulton të ketë qenë shtatzënë.
Në kërkim për veprat penale “dhunë në familje” dhe “shkaktim vetëvrasjeje” është shpallur ish-bashkëshorti i saj, Eraldo Fizi. Çifti ishte ndarë prej disa kohësh dhe Xhuana jetonte në Tiranë në një shtëpi me qira.
Para se të pinte fostoksinë, vajza kishte shkruar një letër ku kërkonte ndjesë prindërve, ndërsa shkruante se nuk donte të lëndohej më nga personat që e kishin lënduar.
Rasti i Xhuana Nikollajt rikthen në vëmendje dramën e shumë grave dhe vajzave që përballen me dhunën në familje. Në vitet e fundit, rastet e denoncuara për dhunë ndaj grave kanë shënuar rritje, ndërsa tragjedi të tilla tregojnë se shpesh dhuna mbetet e padukshme deri në momentin kur është tepër vonë. Institucionet dhe shoqëria përballen gjithnjë e më shumë me nevojën për ndërhyrje më të forta për të parandaluar dhunën dhe për të mbrojtur jetën e grave që gjenden në situata të rrezikshme.
