Një 62-vjeçar ka ndërruar jetë pas një aksidenti të ndodhur në minierën e Theknës në Martanesh. Sipas policisë, viktima, i cili ushtronte detyrën e administratorit në këtë subjekt, humbi jetën si pasojë e plagëve të marra gjatë aksidentit. Në lidhje me ngjarjen janë shoqëruar disa persona për hetime të mëtejshme.
Njoftimi
Më datë 04.11.2025, rreth orës 10:15, në një subjekt minerar në zonën e Theknës, Martanesh, dyshohet se gjatë kontrollit në frontin e punës është aksidentuar shtetasi S. K., rreth 62 vjeç, me detyrë administrator në këtë subjekt, i cili si pasojë e dëmtimeve të marra ka humbur jetën.
Në vijim të veprimeve, Policia ka shoqëruar disa persona të stafit drejtues dhe teknik të subjektit minerar, me qëllim sqarimin e plotë të rrethanave të ngjarjes.
Grupi hetimor, nën drejtimin e Prokurorisë, po vijon punën për dokumentimin e plotë të shkaqeve të ngjarjes.
