Një ngjarje e rëndë ka ndodhur mëngjesin e sotëm, më 19 tetor, në qytetin e Maliqit, ku një banesë është përfshirë nga flakët, duke shkaktuar humbjen e jetës së një gruaje. Dy fëmijët e saj kanë arritur të shpëtohen dhe janë transportuar me urgjencë në spitalin rajonal të Korçës.
Sipas informacioneve paraprake, nëna nuk ka mundur të dalë nga banesa në kohë dhe ka ndërruar jetë si pasojë e asfiksimit, ndërsa fëmijët kanë pësuar djegie në pjesë të ndryshme të trupit. Ata ndodhen nën kujdesin e mjekëve dhe fatmirësisht janë jashtë rrezikut për jetën.
Shkaqet e shpërthimit të zjarrit nuk janë bërë ende të ditura. Në vendngjarje kanë mbërritur forcat zjarrfikëse dhe grupi hetimor, të cilët po punojnë për zbardhjen e plotë të rrethanave të ngjarjes.
