Marsel Liçaj dhe Ermal Liçaj, janë dy vëllezërit fierakë, të cilët akuzohen nga SPAK si pjesë e një grupi kriminal që ka trafikuar heroinë në të paktën shtatë raste nga Suedia drejt Danimarkës.
Sipas SPAK vëllezërit u larguan nga Danimarka, pasi atje u arrestuan kunati i tyre dhe disa shtetas të tjerë të akuzuar si pjesë e grupit. Marsel Liçaj u arrestua dy ditë më parë, ndërsa Ermal Liçajt iu komunikuan masat e sigurisë “detyrim për paraqitje” dhe “ndalim i daljes jashtë shtetit”.
“Autoritetet daneze, në muajin gusht të vitit 2023 kanë regjistruar procedimin penal nr. 0100-71282-00102-23 – “Operacioni Bacchus”. Në hetim ishte një grup shtetasish shqiptarë dhe të huaj, të cilët në kuadër të grupit të strukturuar kriminal kanë zhvilluar aktivitetin kriminal të trafikimit dhe shpërndarjes së lëndëve narkotike të llojit heroinë në Mbretërinë e Danimarkës. Kjo veprimtari është shtrirë nga 1 tetor 2023 deri më 23 janar 2024, në 7 episode, gjatë të cilëve, anëtarët e grupit kriminal kanë importuar në Mbretërinë e Danimarkës heroinë përmes shtetit kufitar të Suedisë. Lënda narkotike e trafikuar, përgatitej për shitje në tregun danez, e përzierë me lëndë të tjera si paracetamol dhe kafeinë, me qëllim maksimizimin e fitimeve”, njoftoi SPAK.
