Një automjet tip Ferrari, me vlerë rreth 600,000 euro, është sekuestruar nga autoritetet shqiptare, pas dyshimeve se është përfituar nga veprimtaria kriminale e trafikimit të lëndëve narkotike.
Automjeti u ndalua gjatë një operacioni të realizuar nga specialistët e Seksionit për Hetimin e Pastrimit të Parave dhe Aseteve, në bashkëpunim me Forcën e Posaçme “Shqiponja”, në rrugën "Abdyl Frashëri" në Tiranë.
Drejtuesi i automjetit, shtetasi E. V., 33 vjeç, i cili është i dënuar më parë në Turqi për trafikim narkotikësh, dyshohet se ka përdorur këtë automjet si pjesë të aktivitetit të tij kriminal. Hetimet zbuluan gjithashtu se automjeti ishte regjistruar në emër të S. Ll., një 36-vjeçar, për të shmangur gjurmët e policisë. Automjeti ishte sjellë në Shqipëri nga një tjetër person, A. L., gjithashtu 33 vjeç, për llogari të E. V..
Në kuadër të hetimeve, janë vënë në hetim edhe dy personat e tjerë të përfshirë, ndërsa procedimi penal është nisur për të tre individët. Po ashtu, vijojnë hetimet për të identifikuar dhe sekuestruar pasuri të tjera të dyshuar të përfituara nga veprimtaritë kriminale të E. V. në Turqi.
Materialet procedurale janë dërguar në Prokurorinë e Tiranës për veprime të mëtejshme.
