Një ngjarje e rëndë është shënuar mbrëmjen e sotme në Memaliaj, ku një person ka humbur jetën si pasojë e të shtënave me armë zjarri.
Sipas informacionit paraprak të Policisë, rreth orës 20:50, pas një konflikti, shtetasi Donald Nela, 29 vjeç, i njohur edhe si “Tupja”, dyshohet se ka qëlluar me armë zjarri shtetasin Endri Goxha, 30 vjeç, i cili ka ndërruar jetë gjatë transportimit për në spital.
Gjithashtu, i plagosur ka mbetur edhe vëllai i autorit të dyshuar, Darjo Nela, 25 vjeç, i cili ndodhet jashtë rrezikut për jetën.
Sipas informacioneve, Donald Nela rezulton të jetë personi me të cilin ka pasur kontakt për herë të fundit 30-vjeçari Erald Muçi, i raportuar më herët si i zhdukur. Ky i fundit njihej si mik i afërt i Aleksandër Sadikaj, i cili u vra më 11 qershor 2022 në një atentat me eksploziv pranë zonës së TEG-ut në Tiranë.
Pas ngjarjes në Memaliaj, autori i dyshuar është larguar me automjet, ndërsa shërbimet e Policisë janë vënë në ndjekje të tij.
Në vendngjarje është ngritur një grup i posaçëm hetimor, nën drejtimin e Prokurorisë, për zbardhjen e plotë të rrethanave dhe dokumentimin ligjor të rastit.
