Gjykata Evropiane e të Drejtave të Njeriut ka konstatuar se Shqipëria ka shkelur të drejtën për jetën private të ish-gjyqtarit Ervin Metalla, duke e shkarkuar në mënyrë joproporcionale gjatë procesit të vettingut.
Në vendimin e publikuar më 5 maj 2026, gjykata në Strasburg analizoi vendimet e Komisioni i Pavarur i Kualifikimit dhe Kolegji i Posaçëm i Apelimit, të cilat kishin vendosur largimin e Metallës nga detyra për shkak të parregullsive në deklarimin e pasurisë dhe dyshimeve për transaksione fiktive.
Sipas gjykatës, edhe pse disa veprime të gjyqtarit mund të ngrinin pikëpyetje etike, ato nuk arrinin nivelin e nevojshëm për të justifikuar masën më të rëndë disiplinore, siç është shkarkimi përfundimtar nga sistemi i drejtësisë. Vendimi thekson se autoritetet shqiptare nuk kryen një analizë të plotë dhe proporcionale të rastit, duke mos balancuar siç duhet interesin publik me të drejtat individuale të aplikantit.
Një element kyç i arsyetimit lidhet me kërkesën ndaj Metallës për të provuar burimin e të ardhurave të vëllait të tij. Sipas Strasburgut, kjo përbënte një barrë disproporcionale dhe jo të justifikuar në rrethanat konkrete.
Gjykata konstatoi shkelje të nenit 8 të Konventës Evropiane për të Drejtat e Njeriut dhe i njohu Metallës të drejtën për kompensim financiar: 20,400 euro për dëme materiale, 6,000 euro për dëme jomateriale dhe 6,000 euro për shpenzime gjyqësore.
Në përfundim, Strasburgu sugjeron që çështja të rihapet nga autoritetet shqiptare, në përputhje me standardet e saj, nëse kjo kërkohet nga aplikanti.
