Forcat speciale të Drejtorisë së Përgjithshme të Burgjeve ushtruan një kontroll të befasishëm në qelitë e burgut të sigurisë së lartë në Drenovë. Burimet bëjnë me dije se në njërën nga qelitë në godinën B, ku ndodhej i dënuar XH.L, është gjetur dhe sekuestruar një celular që dyshohet se përdorej nga i dënuari Laert Haxhiu, si dhe një sasi e vogël lëndë narkotike.
Laert Haxhiu, kreu i një prej grupeve më të rrezikshme kriminale në vend, kundërshtar i përbetuar i Aldo Bares, vuan dënimin me burg të përjetshëm për masakrën e Lushnjes në 2017, ndërsa po gjykohet në Gjykatën e Posaçme për disa vrasje. Më herët në qelitë e burgut të Drenovës u regjistrua edhe një skandal, pasi në takime speciale me të dënuarin me burg përjetë kishin hyrë vajza të show bizzit. Celulari që iu sekuestrua atë kohë Laert Haxhiut u dërgua për ekspertizë në laborator dhe dosja është nën hetim nga SPAK.
