SPAK ka ngritur zyrtarisht akuzë ndaj dy ish-prokurorëve të Prokurorisë së Sarandës, Kledian Llaho dhe Çlirim Shahini, në kuadër të një hetimi për dyshime korrupsioni që lidhen me lehtësimin e masave të sigurisë ndaj biznesmenit Pando Papuçi, i cili më herët ishte nën hetim për ndërtim pa leje.
Sipas SPAK, Llaho akuzohet për veprën penale të korrupsionit, ndërsa Shahini, aktualisht avokat, dyshohet për ushtrim të ndikimit të paligjshëm. Dyshohet se të dy ish-prokurorët i kërkuan Papuçit shumën totale prej 55 mijë eurosh në këmbim të ndërhyrjes në procedurat gjyqësore, me synimin e zbutjes së masave të sigurisë. Hetimet tregojnë se Papuçi kishte shmangur drejtësinë për rreth dy vite dhe u arrestua më pas, ndërsa masa e tij e sigurisë u ndryshua brenda një ore nga gjyqtarja Edona Vajushi, pas kërkesës së prokurorisë. SPAK dyshon se kjo lëvizje ishte pjesë e një skeme të paracaktuar për të ndikuar vendimmarrjen gjyqësore përmes pagesave të paligjshme.
Sipas prokurores Manjola Kajana, Llaho dyshohet se ka përfituar 30 mijë euro, të cilat, sipas hetimit, u transmetuan përmes biznesmenit Vasil Bakalli, i cili dyshohet se ka vepruar si ndërmjetës. Paratë dyshohet se janë siguruar në Greqi. Pas daljes nga burgu dhe vendosjes në masën “arrest shtëpie”, Papuçi dyshohet se ka paguar edhe 25 mijë euro të tjera Çlirim Shahinit, me qëllim që ky i fundit të ndërhynte për zëvendësimin e masës me “detyrim paraqitjeje”. Edhe kjo kërkesë është pranuar më pas nga gjykata.
Çështja ndaj dy ish-prokurorëve pritet të shqyrtohet në Gjykatën e Posaçme kundër Korrupsionit dhe Krimit të Organizuar (GJKKO). Ndërkohë, në gusht të këtij viti, Gjykata e Apelit ka vendosur se Pando Papuçi nuk kishte konsumuar vepër penale lidhur me akuzën për ndërtim pa leje, duke rrëzuar thelbin e çështjes ndaj tij.
