SPAK kërkoi dënimin me burgim të përjetshëm për Plarent Dervishajn, i akuzuar si organizator i atentatit të 1 nëntorit 2019 te mbikalimi i Shkozetit, mbi automjetin e ish-prokurorit të Durrësit, Arjan Ndoj, ku ky i fundit dhe miku i tij Aleksandër Laho mbetën të plagosur, ndërsa u vra shoferi Andi Maloku.
Për Julian Mecaj, që konsiderohet si krahu i djathtë i Dervishajt u kërkua dënimi me 35 vite burgim. Dervishaj dhe Mecaj u gjykuan veçmas nga të pandehurit e tjerë, për shkak se u arrestuan dhe më pas u dëbuan nga Dubai. Më herët është dënuar me burgim të përjetë Redian Rraj, nipi i ish-deputetit socialist Rrahman Rraja, në rolin e ekzekutorit, ndërsa Ariol Halilaj si bashkëpunëtor. Të pandehurit e tjerë janë dënuar me masa më të lehta në procese të veçanta.
