Prokuroria e posaçme kundër korrupsionit dhe krimit të organizuar (SPAK) i ka kërkuar Kuvendit të Shqipërisë autorizimin për arrestimin dhe heqjen e lirisë së zëvendëskryeministres dhe ministres së Infrastrukturës dhe Energjisë, Belinda Balluku.
Kërkesa, e depozituar më 16 dhjetor 2025 dhe e firmosur nga drejtuesi i SPAK, Altin Dumani, është paraqitur në kuadër të procedimit penal nr. 136 të vitit 2025. SPAK i drejtohet Kuvendit duke kërkuar zëvendësimin e masave aktuale të sigurisë personale, “ndalimi i daljes jashtë shtetit” dhe “pezullimi i ushtrimit të një detyre a shërbimi publik”, me masën e arrestit në burg ose arrestit në shtëpi.
Në dokument thuhet se kërkesa mbështetet në nenet 73, 95 dhe 103 të Kushtetutës, nenet 260, 288 dhe 289 të Kodit të Procedurës Penale, si dhe në nenet 13 dhe 118 të Rregullores së Kuvendit.
SPAK ka bashkëngjitur gjithashtu relacionin e arsyetuar, provat përkatëse dhe urdhrin për ruajtjen e sekretit hetimor dhe ndalimin e publikimit të akteve, në përputhje me nenin 288 të Kodit të Procedurës Penale.
Kërkesa i është drejtuar kryetarit të Kuvendit, Niko Peleshi, dhe pritet të shqyrtohet nga organet përkatëse parlamentare, përpara se çështja t’i kalojë seancës plenare për vendimmarrje.
