Në muajin dhjetor 2025 dhe janar 2026 agjentët e Byrosë Kombëtare të Hetimit ushtruan kontroll në banesat e njerëzve më të besuar të Belinda Ballukut, në kuadër të hetimeve që po kryhen ndaj ish-zëvendëskryeministres dhe ish-ministres së Infrastrukturës dhe Energjisë, Belinda Balluku. Kontrolleve iu nënshtruan edhe ish-kreu i ARRSH-së, Gentian Gjyli dhe ish-administratori i KESH, Erald Elezi, si dhe biznesmenët Ilir Shtufi e Rrok Gjoka, kompanitë e të cilëve kanë fituar tendera të rrugëve, që dyshohen të paracaktuar me ndikimin e Ballukut.
Për shkak të një vendimi të Gjykatës Kushtetuese, që nuk lejon më SPAK që pas sekuestrimit të bëjë këqyrjen dhe aksesimin e pajisjeve, prokurorët e posaçëm iu drejtuan me kërkesë GJKKO-së.
Me një vendim të datës 19 mars, Erjon Çela e miratoi kërkesën e Prokurorisë së Posaçme dhe lejoi aksesimin dhe marrjen e të dhënave nga dhjetëra celularë e pajisje kompjuterike, përfshirë edhe ato të biznesmenëve të njohur. Avokatët kanë insistuar që të mos lejohet marrja e asnjë të dhëne tjetër, veç atyre që lidhen direkt me çështjen objekt hetimi. Por, në dispozitiv, gjyqtari ka lejuar edhe marrjen e të dhënave të tjera, që mund të shërbejnë si indicie për nisjen e hetimeve për vepra të tjera penale apo implikim të zyrtarëve të tjerë.
Nga zbërthimi i këtyre pajisjeve prokurorët shpresojnë të sigurojnë prova të reja ndaj ish-numrit dy të qeverisë, për të cilën mazhoranca socialiste votoi kundër kërkesës së SPAK për leje për ta arrestuar.
Belinda Balluku është e pandehur dhe nën hetim për abuzime me tenderat e rrugëve në vlera miliona euro. Ndaj saj SPAK ka çelur edhe hetim pasuror.
