Prokuroria e Posaçme kundër Korrupsionit dhe Krimit të Organizuar ka kaluar për gjykim dosjen penale ndaj ish-deputetit të Partisë Socialiste, Jurgis Çyrbja. Në seancën paraprake të zhvilluar këtë të hënë, Çyrbja, përmes avokatit të tij, ka kërkuar gjykim të shkurtuar.
Ish-deputeti akuzohet për tre vepra penale: “Korrupsion aktiv në zgjedhje”, “Përkrahje e autorit të krimit” dhe “Tregtim i sekretit shtetëror”. Ai u arrestua të dielën në Durrës, pak ditë pasi dorëzoi mandatin e deputetit, që e kishte mbajtur që nga viti 2017.
Sipas hetimeve të kryera nga SPAK, Çyrbja ka komunikuar përmes aplikacionit të enkriptuar “Sky ECC” me persona të shpallur në kërkim, duke shkëmbyer informacione që lidhen me dokumente dhe akte zyrtare që përbëjnë sekret shtetëror, sipas legjislacionit në fuqi.
