Shemsi Bahtiri, anëtar i lëvizjes Vetëvendosja në Kosovë, u arrestua disa kohë më parë nën dyshimet për trafik droge pas zbërthimit të aplikacionit të koduar Sky ECC.
Në kuadër të hetimit, Prokuroria Speciale e Kosovës kërkoi ndihmë nga SPAK për të gjurmuar dhe sekuestruar pasuritë e Bahtirit në Shqipëri, pasi kishte dyshime të forta se paratë e drogës i kishte investuar në pasuri të paluajtshme. SPAK, pas verifikimeve, ka mundur të sekuestrojë vetëm një apartament në Qerret të Kavajës në pronësi të 62-vjeçarit.
Ndërkohë, nga shikimi i faqes së Qendrës Kombëtare të Biznesit rezultoi se Shemsi Bahtiri zotëron 100 për qind të aksioneve të subjektit “DAIMAN” shpk, me objekt veprimtarie “shitblerje e pasurive të paluajtshme”, por nuk rezulton të jetë vënë nën sekuestro. Prokuroria Speciale kërkoi ndihmë edhe për verifikimin e personave të tjerë të dyshuar, por SPAK nuk zbuloi që të kishin pasuri.
Bahtiri u arrestua në kuadër të operacionit “Qielli i thyer”, gjatë të cilit u sekuestruan edhe prova të shumta materiale.
