Bashkia e Tiranës ka dhënë një tjetër tender, duke skualifikuar ofertën më të mirë nga gara. Bëhet fjalë për procedurën që ka si qëllim rehabilitimin e disa rrugëve të bllokut që kufizohet nga rrugët “3 Dëshmorët”, “Kadri Roshi” dhe “Panajot Pano”, të cilat ndodhen në zonën e Kasharit në kryeqytet.
Për këtë procedurë, bashkia kishte vendosur një fond prej 1 miliard lekësh, ndërsa për të kishin shfaqur interes 26 kompani. Oferta më e mirë ishte propozuar nga subjekti “MELA.” sh.p.k., e cila kishte kërkuar 585 milionë lekë për ta realizuar punën. Por Bashkia e Tiranës e ka skualifikuar nga gara dhe fitues ka shpallur subjektin “INERTI” sh.p.k., e cila kishte ofertën e dytë më të mirë me 594 milionë lekë, ose rreth 10 milionë lekë më shumë se e para.
Kompania fituese është në pronësi të biznesmenëve Halil Muha dhe Florjan Muha. Ky i fundit është përfolur në media se ishte prezent në protestën para SPAK kur kryebashkiaku Erion Veliaj u arrestua. Madje, në videon që qarkulloi në rrjetet sociale, ku shfaqej një person që thërriste “Lali Eri o flori, ne të presim në bashki”, mediat pretenduan se ishte Florjan Muha.
Përtej këtyre pretendimeve, ajo çka është fakt është se kompania e biznesmenit në fjalë vijon të jetë e preferuara e Bashkisë së Tiranës, si me Veliajn jashtë, ashtu edhe brenda në burg.
“INERTI” sh.p.k rezulton se ka marrë 32 tenderë publikë në të gjithë vendin dhe 15 prej tyre vetëm nga Bashkia e Tiranës.
