Drejtori i Përgjithshëm i Policisë së Shtetit, Skënder Hitaj, i ka “caktuar” kufirin Partisë Demokratike për të protestuar, ndërsa paralajmëroi se nëse shkelet, do të përballen me reagimin e forcave të rendit.
Në një konferencë për mediat, Hitaj deklaroi se protesta është autorizuar për t’u zhvilluar në bulevardin “Dëshmorët e Kombit” dhe duhet të qëndrojë brenda këtij perimetri.
“Policia e Shtetit ka marrë të gjitha masat që protesta të organizohet dhe të zhvillohet në mënyrë të qetë dhe paqësore. Leja është kërkuar për bulevardin ‘Dëshmorët e Kombit’ dhe aty duhet të jetë e përqendruar. Në rast të veprimeve joligjore nga ana e protestuesve, do të veprohet në bazë të procedurave standarde dhe në bazë të ligjit dhe Kodit Penal”, deklaroi kryepolici.
Kujtojmë se në protestën e fundit të PD, policia pati një reagim ndryshe nga herët e tjera, duke ndërhyrë menjëherë ndaj protestuesve dhe duke shpërndarë grupin që hidhte molotovë. Policia nuk kurseu as deputetët e PD, duke u përplasur fizikisht dhe duke përdorur spraj ndaj tyre.
