Vijon të jetë aktiv zjarri që ka përfshirë disa magazina në tregun e rrobave të përdorura në rrugën “5 Maji” në Tiranë, duke shkaktuar panik te banorët dhe bizneset e zonës.
Sipas raportimeve nga vendngjarja, flakët janë të përmasave të mëdha dhe po përhapen me shpejtësi, duke rrezikuar seriozisht edhe disa biznese që ndodhen pranë tregut. Tymi i dendur ka mbuluar zonën, ndërsa banorët dhe tregtarët janë detyruar të largohen për arsye sigurie.
Forcat zjarrfikëse ndodhen në terren dhe po punojnë për izolimin e zjarrit, por pavarësisht ndërhyrjes së tyre, situata mbetet e vështirë për t’u vënë nën kontroll për shkak të intensitetit të flakëve dhe materialeve të shumta të djegshme në magazina.
Pamje dramatike janë regjistruar edhe pranë zonës së Medresesë, ku nga vatrat e zjarrit dëgjohen shpërthime të herëpashershme. Deri më tani janë evakuuar banorët e disa pallateve përreth, ndërsa pronarët e subjekteve tregtare kanë mbërritur të panikosur në zonë, duke u përpjekur të shpëtojnë çfarë munden. Në vendngjarje kanë mbërritur dhjetëra mjete zjarrfikëse dhe ambulanca, por sipas raportimeve mediatike, autobotët me ujë e kanë të pamundur të futen në zonë për shkak të trafikut të rënduar.
Deri në këto momente nuk raportohet për persona të lënduar, ndërsa shkaqet e zjarrit mbeten ende të paqarta. Autoritetet po vijojnë ndërhyrjen dhe monitorimin e situatës.
