Një skandal i paprecedentë ka përfshirë institucionet shtetërore. Vera miliona euro që u zbulua në vilën e Ergys Agasit është zhdukur. Në kërkim është shpallur kushëriri i tij Eno Agasi.
Historia është e tillë. Burime për VNA kanë thënë se pasi agjentët e BKH-së konstatuan kantinën e verës njoftuan drejtorinë e Doganave pasi malli ishte kontrabandë.
Doganat bënë inventarin përgjatë disa orëve dhe përllogaritën një dëm prej 400 mln lekësh buxhetit të shtetit nga mospagimi i akcizës. Për shkak se ishte natë dhe nuk mund të bëhej transporti, malli u la në ruajtje në vilë. Gjatë natës Eno Agasi e ka hequr verën dhe ka hequr me pas serverin e kamerave të sigurisë. Kur furgonat e Doganës kanë shkuar për ta marrë mallin dhe dërguar në ruajtje kanë konstatuar se nuk ishte në kantinë.
Eno Agasi është shpallur në kërkim për akuzat, veprime që pengojnë zbardhjen e së vërtetës, kontrabandë e mallrave që paguajnë akcizë dhe magazinim i mallrave që paguajnë akcizë.
Prokurori Bledar Valikaj po heton për kallëzim të rremë dhe administratorin e kompleksit.
Ergys Agasi është shpallur në kërkim nga SPAK bashkë me Ermal Beqirin pasi urdhëruan marrjen peng të biznesmenit Gerond Mece që ta detyronin të tërhiqej nga tenderat. Në arrest shtëpie është dërguar Mirlinda Karcanaj drejtoreshë e AKSHI dhe nënndrejtoresha Hava Delibashi. 4 persona të tjerë janë nën masa më të lehta sigurie.
