Ilir Beqaj
Gjykata e Posaçme ka vendosur të shtyjë për më 13 nëntor seancën gjyqësore ndaj ish‑ministrit të Shëndetësisë, Ilir Beqaj, në çështjen e njohur si “Sterilizimi”.
Ish‑ministri nuk ishte i pranishëm në seancë, ku ai akuzohet për “vjedhje duke shpërdoruar detyrën” dhe pjesëmarrje në “grup kriminal”, për shkak se në të njëjtën kohë ndodhej në një sallë tjetër të Gjykatës së Posaçme për shqyrtimin paraprak të dosjes “SASPAC”.
Beqaj përballet me dy dosje të ndara, njëra për aferën e “Sterilizimit” dhe tjetra për çështjen “SASPAC”, ku ai akuzohet për abuzime me fondet e Bashkimit Europian dhe prokurime të dyshimta.
