Një 21-vjeçar nga Berati është arrestuar nën dyshimin se ishte i përfshirë në një rrjet shpërndarjeje droge, duke siguruar kanabis sativa që e ndante në doza për shitje.
Operacioni i koduar “Porcione”, i finalizuar më 7 Nëntor, u krye nga Seksioni për Hetimin e Narkotikëve, në bashkëpunim me Forcën e Posaçme “Shqiponja” dhe Forcën e Posaçme Operacionale. Hetimi përfshinte metoda proaktive, përgjime ambientale dhe ndjekje.
Sipas policisë vendore, gjatë operacionit u arrestua shtetasi A. K., 21 vjeç, dhe u procedua në gjendje të lirë shtetasi K. K., 20 vjeç, të dy banues në Berat. Hetimet zbuluan se i arrestuari siguronte sasi kanabisi, të cilën e ndante në doza në banesën e tij në lagjen “30-Vjetori” dhe më pas ia jepte 20-vjeçarit për shpërndarje me automjet.
Materialet narkotike e sekuestruara në banesën e A. K., automjetin e K. K. dhe celularët e tyre u dorëzuan si prova materiale. Materialet procedurale iu referuan Prokurorisë së Beratit për veprime të mëtejshme.
