Policia e Shkodrës ka vënë në pranga ditën e sotme 17-vjeçarin Danjel Ndreu, i shpallur në kërkim si i dyshuar për bashkëpunim në atentatin e 8 shtatorit në qendër të qytetit, ku humbën jetën Liridon Kraja dhe Armando Pali, ndërsa u plagosën Erogen Brajoviç dhe kamarierja Meri Kaceri.
I mituri u ndalua gjatë një kontrolli rutinë, ku policia i gjeti disa doza kokaine. Ndreu rezultonte i shpallur në kërkim edhe për vjedhjen e një motori në muajin gusht.
Ngjarja e rëndë ndodhi pranë Bashkisë së Shkodrës, ku Ragip Gila qëlloi me breshëri ndaj tavolinës ku po qëndronin Armando Pali dhe Erogen Brajoviç. Shënjestër dyshohet se ishte Brajoviç, i cili mori tre plumba, ndërsa Pali dhe truproja i tij, Liridon Kraja (Lushi), humbën jetën si pasojë e plagëve.
Kamarierja 25-vjeçare Meri Kaceri mbeti e plagosur, por fatmirësisht jashtë rrezikut për jetën.
Policia po vijon hetimet për zbardhjen e plotë të ngjarjes dhe identifikimin e personave të tjerë të përfshirë.
