Përpjekjet për të futur lëndë narkotike brenda ambienteve të burgut të Korydallos në Greqi vijojnë të jenë të shpeshta, por këtë herë një skemë e re ka dështuar menjëherë.
Sipas mediave greke, një person ende i paidentifikuar ka tentuar të kalojë lëndë narkotike brenda burgut duke hedhur nga Rruga Nikiforidis tre pako në drejtim të oborrit të institucionit, me qëllim që ato të përfundonin tek një i burgosur. Dyshohet se ky veprim është kryer me kërkesë të një të dënuari që ndodhet aktualisht në këtë burg, ku vuajnë dënimin edhe disa shtetas shqiptarë të përfshirë më herët në trafik droge.
Megjithatë, plani nuk shkoi sipas pritshmërive. Një nga pakot nuk arriti të kapërcente murin dhe ra në rrugë, duke zbuluar përmbajtjen e saj: 63 gramë hashash. Dy pakot e tjera u gjetën menjëherë nga autoritetet brenda territorit të burgut. Në njërën u sekuestruan 68.9 gramë kokainë në formë të ngurtë, ndërsa në tjetrën u fsheheshin 409 gramë hashash në formë çokollate.
E gjithë sasia e drogës u sekuestrua menjëherë nga Departamenti i Sigurisë së Korydallos, i cili ka nisur hetimet për të zbuluar identitetin e personit që kreu hedhjen e pakove dhe për të përcaktuar nëse bëhet fjalë për një tentativë të organizuar nga rrjete kriminale që operojnë brenda dhe jashtë burgut.
