Një arsenal armësh është sekuestruar në Tiranë, ndërsa katër persona kanë përfunduar në pranga, si rezultat i një aksioni policor të zhvilluar nga Komisariati i Policisë nr. 3, në bashkëpunim me Prokurorinë e Tiranës.
Nga hetimet u dokumentuan disa raste të trafikimit të armëve dhe municioneve. Në kuadër të operacionit u arrestuan shtetasit:
Gloris Nezaj, me precedentë të mëparshëm penalë për krime kundër jetës dhe personit;
Rezarto Rumi, me precedentë penalë për prodhim dhe shitje të lëndëve narkotike;
Kelvin Caushi, me precedentë penalë për krime kundër jetës dhe personit;
Ardjan Caushi.
Hetimet provuan se këta shtetas, në bashkëpunim me njëri-tjetrin, furnizonin me armë zjarri grupe kriminale që vepronin kryesisht në qarkun e Tiranës. Secili prej tyre kishte një rol të përcaktuar, që nga sigurimi i pjesëve të armëve të zjarrit, magazinimi dhe përshtatja e tyre, deri te shitja.
Sipas hetuesve, armët e zjarrit porositeshin pjesë-pjesë nga Kosova, më pas modifikoheshin dhe magazinoheshin në zonën e Selitës.
Fillimisht u sekuestruan dy armë zjarri, në cilësinë e provës materiale, nga njëri prej anëtarëve të grupit që kishte rolin e shitjes së armëve te porositësit. Më pas u zbulua ambienti ku magazinoheshin armët.
Gjatë aksionit u sekuestruan:
3 armë zjarri automatike;
5 armë zjarri pistoleta;
1 armë gjahu teke, me mbishkrimin “Breda Brescia Italy”;
12 krehëra për armë automatike dhe pistoleta;
një sasi e konsiderueshme municionesh luftarake për armë automatike dhe pistoleta;
1 jelek antiplumb ushtarak;
9 pjesë metalike të dyshuara si pjesë armësh zjarri;
3 radio-marrëse/dhënëse me mbishkrimin “Bondi”, të ngjashme me ato të Policisë;
9 aparate telefonike celularë;
1 shkop metalik, i ngjashëm me ata të Policisë;
1 sopatë e vogël me ngjyrë të zezë, me pjesë çekiçi;
36 mijë euro;
1 DVR me mbishkrimin “Hikvision”.
Ndaj të dyshuarve rëndojnë veprat penale:
“Trafikimi i armëve dhe municioneve”, “Prodhimi dhe mbajtja pa leje e armëve të ftohta”, “Prodhimi dhe mbajtja pa leje e armëve të gjuetisë dhe sportive”, “Mbajtja pa të drejtë e uniformës” dhe “Fshehja e të ardhurave”.
