Prokuroria e Vlorës ka njoftuar se me kërkesë të saj, është vendosur masa e sigurimit pasuror “Sekuestro preventive” për një sërë pasurish të paluajtshme dhe të luajtshme me vlerë rreth 2 milionë euro. Prona këto që janë në zotërim të Tahir Qenami (i njohur edhe me mbiemrin Kapaj/Canaj), lindur më 21 tetor 1986 në Vlorë dhe banues në të njëjtin qytet.
Sipas njoftimit zyrtar, sekuestrimi është kryer në kuadër të hetimeve për “Pastrimi i produkteve të veprës penale ose veprimtarisë kriminale”, parashikuar nga neni 287 i Kodit Penal. Hetimet janë bazuar në materialet referuese të ardhura nga Drejtoria Vendore e Policisë Vlorë, të cilat lidhin shtetasin Qenami me veprimtari kriminale të zhvilluara jashtë vendit.
Pasuritë e sekuestruara
Në listën e gjatë të pasurive të vendosura nën sekuestro përfshihen disa apartamente, dyqane, njësi tregtare, vende parkimi dhe automjete, të regjistruara në Vlorë dhe në Tiranë. Konkretisht:
Një apartament me sipërfaqe 82 m² në lagjen “29 Nëntori”, Vlorë, në zotërim të Tahir Qenamit;
Një arë me sipërfaqe 2000 m² në Radhimë, në zotërim të shtetasve E.K. dhe F.K.;
Një apartament në Sauk, Tiranë, me sipërfaqe 108.5 m², në zotërim të shtetases E.Q.;
Dy njësi tregtare (dyqane) në lagjen “1 Maji”, Vlorë, me sipërfaqe 50.6 m² dhe 89.8 m², të porositura nga Tahir Qenami;
Një sërë poste parkimi me sipërfaqe që variojnë nga 28 deri në 36 m² në të njëjtën lagje, të gjitha të porositura nga i njëjti person;
Një numër i konsiderueshëm apartamentesh të prenotuara në lagjen “1 Maji”, Vlorë, në katet e ndryshme të një objekti ndërtuar nga shoqëria “Lespipa” shpk, me sipërfaqe që variojnë nga 49.7 deri në 108.45 m²;
Dy automjete: një “Daimler Chrysler” i vitit 1994 (E200) dhe një “Ford Focus” i vitit 2005, në zotërim të Tahir Qenamit.
Hetimi dhe të kaluarën penale të Qenamit
Nga të dhënat e hetimit rezulton se Tahir Qenami ka qenë i përfshirë më parë në veprimtari kriminale në Gjermani, ku është arrestuar më 4 janar 2023 dhe më pas është dënuar për trafik të lëndëve narkotike. Sipas hetuesve, të ardhurat e përfituara nga kjo veprimtari kriminale dyshohet se janë përdorur për investime në pasuri të paluajtshme në Shqipëri, kryesisht në zonën e Vlorës.
