Gjatë dy muajve të fundit, në qarkun e Lezhës janë sekuestruar gjithsej 29 pasuri me një sipërfaqe totale prej 132 322 m², të dyshuara si të përfituara nga veprimtaria kriminale.
Këtë të mërkurë, specialistët e Seksionit për Hetimin e Krimeve Ekonomiko-Financiare, në bashkëpunim me Agjencinë e Administrimit të Pasurive të Sekuestruara dhe të Konfiskuara, konfiskuan 9 pasuri të tjera të paluajtshme. Bëhet fjalë për 7 sipërfaqe toke dhe 2 apartamente, të ndodhura në Shëngjin, Ishull Shëngjin dhe Ishull Lezhë, me sipërfaqe totale prej 33 815 m².
Sipas njoftimit zyrtar, masa u mor në zbatim të vendimit të GjKKO-së, të lënë në fuqi nga Gjykata e Posaçme e Apelit për Korrupsionin dhe Krimin e Organizuar, në kuadër të punës për gjurmimin dhe goditjen e aseteve kriminale.
Autoritetet theksojnë se operacionet për identifikimin dhe konfiskimin e pasurive të dyshuara kriminale do të vijojnë.
