Nis në Gjykatën e Posaçme procesi për dosjen “Partizani”.
Avokati i ish-kryeministrit Sali Berisha, Genc Gjokutaj kërkoi pavlefshmëri absolute për marrjen si të pandehur dhe të njoftimit të akuzës për Berishën.
"Nga të dhënat e njoftimit nga SPAK, konstatohet se Berisha në cilësinë e tij si kryeministër, ka kryer veprime konkrete, duke marrë akte ligjore dhe nënligjore me qëllim përfitimin e familjeve pronare, ku përfitues ishte edhe Jamarbër Malltezi. Prokuroria ka tejkaluar kompetencën e saj kushtetuese, duke u bazuar në opinione. Ngritja e akuzës nuk është kryer në funksion të ushtrimit të kompetencës së saj. Prokuroria nuk ka përfaqësuar interesat e shtetit, por të një force politike, me qëllim mbajtjen në pushtet të saj”, tha Gjokutaj.
Ish-kryeministri Berisha është i pandehur për korrupsion kryer në bashkëpunim, ndërsa dhëndrri i tij Jamarbër Malltezi akuzohet për korrupsion e pastrim parash. Nën akuzë janë dhe disa bashkëpunëtorë të tyre.
