Në ambientet e Gjykata e Posaçme Kundër Korrupsionit dhe Krimit të Organizuar po zhvillohet seanca paraprake ndaj ish-Presidentit, Ilir Meta. Përpara gjyqtares së seancës paraprake, Irena Gjoka, Meta paraqiti qëndrimin e tij lidhur me akuzat e ngritura nga organi i akuzës. Në fjalën e tij, ai e cilësoi procesin si të pabazuar ligjërisht, duke deklaruar se gjatë tre seancave është paraqitur “një pamflet politik, pa arkitekturë juridike dhe ligjore”. Sipas tij, çështja mbështetet në “gënjeshtra dhe falsifikime”, ndërsa paraburgimi prej 16 muajsh është përdorur si “mjet persekutimi politik dhe njerëzor”.
Në lidhje me akuzat për deklarim të rremë dhe pastrim të produkteve të veprave penale, Meta i mohoi pretendimet, duke thënë se është subjekt deklarues që prej 22 marsit 1992 dhe se, sipas tij, nuk ekziston asnjë shpenzim i padeklaruar. Ai kundërshtoi ekspertizën financiare të paraqitur nga prokuroria, duke e konsideruar të paligjshme dhe në konflikt interesi, si dhe kërkoi autorizimin e një ekspertize të pavarur financiare për periudhën 1992–2023.
Sa i takon çështjes CEZ-DIA, Meta deklaroi se emri i tij nuk përmendet në asnjë shkallë të procesit gjyqësor që ka përfunduar me vendim të formës së prerë, përfshirë edhe vendimin e Gjykata e Lartë.
Ish-Presidenti ngriti gjithashtu shqetësime për kushtet e paraburgimit në IEPV “Jordan Misja”, duke pretenduar se nuk i është dorëzuar vendimi i zbardhur për dënimin e 2 korrikut 2025 dhe se i janë kufizuar ajrosja dhe komunikimi. Sipas tij, janë penguar intervistat me gazetarë, vizitat nga deputetë dhe eurodeputetë, si dhe komunikimi me Sekretarin e Përgjithshëm të Partisë së Lirisë, Tedi Blushi.
Seanca paraprake vijon, ndërsa pritet që gjykata të vendosë mbi kërkesat e palëve lidhur me vlefshmërinë e akteve dhe kalimin ose jo të çështjes për gjykim.
