Një incident i rrezikshëm është regjistruar ditën e sotme në qytetin e Tepelenës, ku është rrëzuar ballkoni i një banese. Për fat të mirë, nuk ka pasur të lënduar, pasi rënia e ballkonit është ndalur nga një shtratore rrushi e vendosur në katin e parë, duke shmangur një tragjedi të mundshme.
Ndërtesa ku ndodhi incidenti është pjesë e projektit të rehabilitimit të fasadave, i cili synon përmirësimin estetik të godinave të vjetra. Megjithatë, kjo ngjarje ka ngritur shqetësime serioze mbi sigurinë strukturore të pallatit. Sipas banorëve, edhe ballkoni i katit të katërt është në gjendje të rrezikshme dhe mund të shembet në çdo moment.
Ekipet e emergjencës ndodhen në vendngjarje, kanë rrethuar zonën dhe po vlerësojnë gjendjen e ndërtesës për të parandaluar rreziqe të mëtejshme për banorët dhe kalimtarët.
Autoritetet lokale pritet të dalin me një reagim zyrtar për të sqaruar shkaqet e shembjes dhe për të bërë të ditura masat që do të merren për garantimin e sigurisë në pallatet e përfshira në projekte të ngjashme.
