Rrëshqitja e dherave në Dragostunjë bllokoi për rreth tetë orë aksin rrugor Librazhd–Prrenjas, duke lënë qindra automjete në pritje. Për drejtorin e Autoritetit Rrugor Shqiptar, përgjigjja ishte e thjeshtë, “shembja është fenomen natyror”.
Drejtori i ARRSH, Ami Kozeli, mohoi kategorikisht çdo ndikim të punimeve në zonë, edhe pse traseja e re rrugore që po ndërtohet i përket pikërisht shpatit të malit që u shemb dhe ku mjetet e rënda punojnë çdo ditë. Sipas tij, problemi nuk janë eskavatorët, por natyra.
“Duket që mali është i mbingopur nga uji”, deklaroi Kozeli, pas një konstatimi “me sy të lirë”, duke ia faturuar rrëshqitjen reshjeve dhe jo punimeve pak metra më sipër.
Shpati në fjalë është pjesë e punimeve për ndërtimin e segmentit të ri rrugor, në kuadër të projektit Koridori VIII.
Pas ndërhyrjes së ekipeve në terren, u bë i mundur pastrimi i aksit dhe qarkullimi u rikthye në të dy drejtimet pas tetë orësh.
